Қазақстан Конституциясы – мемлекетіміздің басты құжаты. Елдің әр азаматы Заңға сүйеніп, өз құқықтары мен міндеттерін білуге құқылы. Алайда бүгінге дейін көзі нашар көретін және зағип жандар үшін Конституция мәтіні қолжетімсіз болатын. Дегенмен жаңа бастама осы олқылықтың орнын толтырып отыр.
Айдана БОРАНБАЕВА
Таяуда С.Торайғыров атын-дағы облыстық кітапханада көзі көрмейтін және нашар көретін азаматтарға арналған брайль қарпіндегі Қазақстан Республикасы Конституциясы кітабының тұсаукесері өтті. Кітаптың тұсаукесеріне облыстық кітапханалардың оқырмандары қатысты.
Салтанатты шараға қатысқан облыстық мәдениет, тілдерді дамыту және архив ісі басқармасының басшысы Медет Тауасқан Брайль қарпіндегі құжаттың маңызын ерекше атап өтті. Конституцияның Брайль қарпіндегі нұсқасы – мүмкіндігі шектеулі жандарға тең мүмкіндіктер беруге бағытталған қадам.
— Қазіргі қоғамдағы кітап оқудан алыстап бара жатқан тұста зағип жандардың кітапқа деген құштарлығы, соның ішінде Конституция еңбегіне қызығу-шылық танытуы — қуантарлық жағдай. Әр адам — осы қоғамның толыққанды мүшесі. Сондықтан мұндай кітаптардың қажеттілігі жоғары. Бұл — үлкен еңбектің жемісі, — деді Медет Алпысбайұлы.
Кітапхана мамандарының пікірінше, мұндай жобалар қоғамдағы кедергілерді азайтып, баршаның тең дәрежеде білім алуына, ақпаратқа қол жеткізуіне мүмкіндік береді.
— Конституцияның Брайль қарпінде жарық көруі – ерекше жоба. Бұл — тек зағип жандарға емес, қоғамға үлгі болатын бастама. Заң – барлығына ортақ. Сондықтан оны ешкімге шектеусіз жеткізу – біздің азаматтық борышымыз. Кітапхана қорының толыққанды бір бөлігі ретінде бұл басылым алдағы уақытта көптеген оқырманға жол ашады. Біз үшін бастысы, әрбір азаматтың білімге, ақпаратқа және рухани құндылықтарға тең қолжетімділігін қамтамасыз ету, — дейді облыстық көзі көрмейтін және нашар көретін азаматтарға арналған арнайы кітапхананың басшысы Жамал Кенжебекова.
Суреттерді түсірген – Есенжол Исабек.