Құрылыс қарқыны аймағымызда биыл да бәсеңдемейді. Оған облыс әкімдігінде аймақ басшысы Асайын Байхановтың төрағалығымен өткен аппараттық жиын барысында айтылған мәліметтер дәлел. Тұрғын үй құрылысымен қатар ауылдық елді мекендерде бой көтеретін әлеуметтік нысандар қатары аз емес.
Облыстық құрылыс басқармасының басшысы Асқар Ажмұраттың айтуынша, 2025 жылы жалпы 14 млрд теңгенің құрылыс жұмыстары жүргізіледі. Бұл қаражатқа аймағымызда 42 нысанда құрылыс жұмыстары жүргізіледі. Олардың 11 – жаңа нысан. Сонымен қатар, 1765 пәтерлі 11 көпқабатты үй бой көтереді. 7-еуі облыс орталығында салынса, үш үй – Екібастұзда, тағы бірі Ақсуда бой көтереді. Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы шеңберінде жалға берілетін тұрғын үй сатып алуға 3 млрд. теңге қарастырылған. Оған 217 пәтер сатып алынбақ.
«Ауылдық денсаулық сақтауды жаңғырту» ұлттық жобасы жалғасын табады. Биыл бұл жоба аясында салынған 6 нысанның құрылысы алдағы үш айда аяқталмақ. Олар – Байет, Үштерек, Ивановка, Ленин, Құркөл, Мыңкөл ауылдарындағы медициналық мекемелер. Павлодар қаласындағы №1 ауруханада да құрылыс жұмыстары түйінделуге таяу көрінеді. Ақсу қаласында аурухананың екі ғимаратының арасын байланыстыратын галереяны салатын мердігер анықталуда.
Білім саласында да құрылыс жұмыстарының ауқымы кең. «Жайлы мектеп» ұлттық жобасы аясында Павлодар қаласында салынып жатқан екі мектептің бірі сәуір айында қолданысқа берілмек. Ол – Достық шағын ауданындағы 1200 орындық мектеп. Қазіргі таңда білім ордасына жиһаздар мен жабдықтарды орнату жұмыстары жүргізілуде. Осы ретте, облыс әкімі Асайын Қуандықұлы аталмыш білім мекемесін педагогтармен және оқушылармен қамту мәселесіне мән беруді тапсырды. Облыстық білім беру басқармасының басшысы Самал Айтқазинаның айтуынша, мектепке 119 маман қажет. Бүгінде өзге мектептерден сыныбымен бірге 21 педагог ауысуға өтініш білдірген. Олар еш конкурссыз жаңа мектепке ауысады. Қалған ұстаздар заңға сәйкес конкурстық негізде қабылданады. Сонымен қатар, соңғы мәліметтер бойынша 900-ден астам оқушы Достықтағы мектепте білім алуға ниет танытып отырған көрінеді. Ал Павлодар қаласындағы Гагарин көшесіндегі №47 мектептің, №34 мектептің қосымша ғимаратының құрылысы биыл тамызда аяқталмақ.
— «Жайлы мектеп» жобасы бойынша салынып жатқан екі мектеп — соңғы 15 жылда бой көтеріп жатқан ірі білім ордалары. Президенттің бастамасымен елімізде қолға алынды. Жаңа оқу жылына дейін жиһазбен қамтып, мектептерді сапалы әрі уақытылы аяқтау керек. Мектептің айналасын абаттандырып, ол аумақты іргесінде тұратын тұрғындардың да пайдалануына мүмкіндік туғызу қажет, — деді облыс әкімі.
Тағы бір қуантарлығы, ағымдағы жылы облыс ауылдарында үш мектеп салынады. Оның екеуі Аққулы ауданының Тілектес және Ертіс ауданының Қызылқақ ауылдарында апаттық мек-
тептердің орнына салынса, бірі Павлодар ауданының Бірлік елді мекенінде бой көтереді. Соңғысында бұрын-соңды мектеп атаулы болмаған. Қызылқақ ауылында салынатын екі қабатты мектеп екі жылдық жоба, келесі жылы қолданысқа берілсе, қалған екеуі биыл оқушыларды қабылдауы тиіс.
— Екі жылда облысымызда үш апаттық мектептің орнына жаңаларын салдық. Моисеевка, Қаражар, Сычевка ауылдарында ашылды. Енді Тілектес, Қызылқақ, Бірлік ауылдарында салынады. Аталған ауыл тұрғындарымен тікелей кездесу кезінде уәде берілді. Енді оны сапалы атқару керек. Аудан әкімдері апта сайын құрылыс алаңына барып, жұмыс барысымен танысып тұруы тиіс. Әр ай сайын құрылыс қарқыны, туындаған мәселелер болса, өзіме баяндап отыруы қажет, — деді А.Байханов.
Спорт саласында 10 нысан салынбақ. Үш аудан орталығында бассейн құрылысы басталады. Бұл ретте, Май ауданындағы бассейн әу баста екі жылға жоспарланған. Облыс әкімі аудан басшылығына мердігермен сөйлесуді тапсырды. Яғни, биыл ол бассейнді толық салып беруге қауқары жетсе, қазынадан қаржы табылатынын атап өтті.
Бұдан бөлек, 6 дене шынықтыру-сауықтыру кешені салынады. Песчан, Байет, Қоянды, Жаңатілек ауылдарында құрылыс жұмыстарына дайындық басталған. Ал Үштерек пен Қаратерек елді мекендерінде спорт нысандарының құрылысы ақяталуға таяу. Баянауыл орталығында салынып жатқан спорт кешенінде құрылыс жұмыстарының 75 пайызы іске асырылған. Мәдениетке келсек, төрт нысанның құрылысы қолға алынады. Алғабас, Мичурин, Қызылағаш ауылдарында мәдениет үйлері, Баянауылда мұражайымен бірге Сапар орталығы салынады.
Сонымен қатар, облыста төрт ірі нысанның жобасы әзірленбек. Асқар Қадырұлының айтуынша, Павлодар қаласында Конгресс-холл, көпфункциялы спорт кешені, Екібастұз бен Павлодар қаласында мұз айдындары салынады. Аймақ басшысы бұл жобалар мәдени, бұқаралық спорт салаларына айтарлықтай серпін беретініне сенім білдірді. Облыс орталығында жоспарланған ірі нысандар Достық шағын ауданында орналасады деп күтілуде.
Облыс әкімі құзырлы органдарға, аудан-қала әкімдеріне құрылыс жұмыстарын қатаң бақылауда ұстауды, уақытылы қолданысқа берілуін қада-ғалауды тапсырды. Мердігерлер міндет-темесін тиісінше орындамаса, заң жүзінде әрекет етуді ескертті.
Гүлжайна ТҮГЕЛБАЙ.
Суреттерді түсірген — Валерий Бугаев.