Аймақ дәрігерлері жүкті әйелді жол бойында босандырып алды. Сәби мерзімінен бұрын дүниеге келген.
Әйел адам жүктілігінің жетінші айында Ақтоғай ауданы Ақжол ауылында тұратын әжесіне қонаққа барған. Таңғы сағат 7.00-шамасында өзін жайсыз сезініп, жедел жәрдем шақырады. Мерзімінен бұрын толғағы басталған келіншекке Жолболды медициналық пунктінің акушер-гинекологы Сара Жайықбаева мен Ақжол ауылының медбикесі Кенжегүл Сыздықова көмекке келеді. Медициналық қызметкерлер жүкті әйелді дереу облыс орталығына жеткізу үшін жолға шығады. Разумовка ауылына жақындаған бойда тәжірибелі мамандар әйелді аман-есен босандырып алған.
– Шақырту түскен бойда үйге дереу жетіп, кәсібилігінің нәтижесінде жедел әрекет еткен аудандық аурухана ұжымына алғыс білдіремін. Ақ халатты абзал жандарға немеремнің аман-есен өмірге келуіне жәрдемдескені үшін ризамын. Еңбектеріңіз жана берсін, – дейді Ақжол ауылының тұрғыны Ирина Шавела.
А.АСҚАРҚЫЗЫ.