Былтыр ауданда бірқатар білім беру мекемелері жаңарып, жаңа мектеп бой көтерді. Білім беру саласындағы мұндай серпін оқушылардың оқу үлгерімін жақсартып, ұстаздардың қызметтік әлеуетін арттыруға мүмкіндік берді.
Атап айтсақ, ауданға қарасты Сычевка ауылында 120 орындық жаңа мектеп ашылып, Жаңа Ямышев орта мектебі мен Розовка бөбекжайындағы білім беру нысандарында күрделі жөндеу жұмыстары жүргізілді. Жөндеу жұмыстарының нәтижесінде терезе блоктары, есіктер мен едендер, электр жабдықтары, жылу жүйелері ауыстырылып, қос ғимараттың қасбеті және шатырлары күрделі жөндеуден өтті.
Сонымен қатар, «Қазақстан халқына» қорының қаржыландыруымен Заря ауылындағы жалпы орта білім беру мектебінің оқу кабинеттері толық жөндеуден өтті. Бүгінгі таңда мұнда химия, физика-биология, география жаңа модификациядағы кабинеттері ашылып, қажетті құрал-жабдықтар мен жаңа жиһаздар сатып алынды. Сондай-ақ, оқушылардың оқу үлгерімін жақсарту, білім беру жүйесіне заманауи технологияларды енгізу мақсатында Чернорецк орта мектебі «IT кабинетімен» жабдықталды.
А.ЕЛЕМЕСҰЛЫ.