Биыл Павлодар облысында 200 шақырымнан астам теміржол рельстері жөнделеді. Оның ішінде 59 шақырым теміржол күрделі жөндеуден өтпек.
Күрделі жөндеу жұмыстары «Еркеншілік-Едіге», «Сороковая-Сары-Оба» учаскелерінде, «Ақсу-1-Ақсу-2» және «Спутник-Бастау» учаскелерінде жоспарланған. Сонымен қатар, Қазақстан теміржолы баспасөз қызметінің хабарлауынша, «Екібастұз-Северный-1» және «Екібастұз-Северный-2» стансаларында орташа жол жөндеу жұмыстары жоспарлануда. Мұнда бес шақырымнан астам теміржол жолы жөнделмек. Бұдан басқа, «ОП-116-Шідерті» учаскесінде рельс тірегі толығымен ауыстырылып, 15 мыңнан астам темірбетон шпалдары төселеді. Сондай-ақ, 70 бағыттама бұрмалардың жиынтығы ауыстырылады.
Ағымдағы жылы ауыр жүк көліктерінің көмегімен 150 шақырымнан астам теміржол жолдарының жағдайы жақсарады. Сондай-ақ, павлодарлық теміржолшылар жолды және бағыттама бұрмаларын қалыпқа келтіру және тежеу жұмыстарын жүргізеді.
Алтынбек МҰҚЫШЕВ.