Өткен аптада облыс әкімі Асайын Байханов «Зеленая роща» шаңғы базасына барып, ел игілігіне пайдалануға берілген заманауи спорттық нысанның құрылыс жайымен танысты. Реконструкциялаудан өткен аталмыш спорт нысаны өңірдегі қысқы спорт түрлерін дамытуға және ірі спорттық іс-шараларды ұйымдастырға мүмкіндік бермек.
Алдымен аймақ басшысы Асайын Байханов жаңа спорт ғимаратындағы шаңғы жарысы мен биатлон секцияларына арналған жаңартылған спорт залын, жабдықталған гимнастика мен тренажер залдарын аралап көрді. Бұл арнайы бөлмелер кәсіби спортшылардың да, қысқы спорт түрлерін ұнататын жандардың да ыңғайлы жағдайда жаттығулар жасап, жарыстарға тиімді дайындалуына мүмкіндік береді. Мұндағы барлық деңгейдегі спортшыларға өз нәтижелерін жақсартуға көмекте-сетін заманауи жабдықтарға ерекше назар аударылды.
— «Зеленая роща» шаңғы базасына алғаш рет келіп, жас спортшыларымыздың қандай жағдайда спортпен шұғылданып жатқандарын көргендегі таңданысым әлі есімде. Балалар киімдерін темір контейнерлерде ауыстырып жатқандарын көрдім. Қазіргі жасалған жағдайлар көптеген балалардың қысқы спорт түрлерімен айналысуына мүмкіндік беріп, олардың жайлылығы мен қауіпсіздігін қамтамасыз етеді деп сенемін, — деді А.Байханов.
Сонымен қатар, аймақ басшысы құрылыстың кейбір олқы тұстарын сынға алып, мердігер ұйым тарапынан жіберілген кемшіліктерді жақын арада жоюды тапсырды. Ғимаратты тексергеннен кейін ол шаңғы жарысы бойынша өтіп жатқан Павлодар қаласының ашық біріншілігін тамашалап, спортшыларға қолдау білдірді. Айтуынша, мұндағы жаңартылған шаңғы жолы 800 метрге ұзартылып, бұрылыстары кеңейтілді. Бұл спортшылардың жүгіру кезіндегі қозғалысын жақсартуға мүмкіндік берді. Сондай-ақ, ол спорттық нысандарды қалпына келтірудің келесі кезеңі Усолкадағы шаңғы базасында жалғасатынын жеткізді. Онда спортшылар мен шаңғы әуесқойлары үшін осындай функционалды, бірақ шағын нысанды салу жоспарлануда. Айта кетейік, «Зеленая роща» базасының шаңғы жолы өңіріміз үшін бірегей спорттық нысан болып табылады. Мұнда қалалық, облыстық жарыстар ғана емес, республикалық деңгейдегі чемпионаттарды да өткізуге үлкен мүмкіндік бар. Жыл сайын базада шаңғы жарысы, шаңғы роллері, триатлон және басқа да спорт түрлерінен Қазақстан Республикасының чемпионаттарын қоса алғанда 100-ден астам спорттық іс-шаралар өткізіледі.
А.МҰҚЫШЕВ, Павлодар қаласы.