Келесі айда кеншілер шаһарында көпқабатты үш үйдің құрылысы толығымен аяқталуы тиіс. Аталмыш баспаналар пәтер кезегінде тұрған азаматтарға тиімді талаптармен беріледі.
Өткен жылдың тамыз айында қаладағы екі шағын ауданда үш үйдің негізі қаланған болатын. Бүгінде жұмыстардың барлығы дерлік аяқталды. Ендігі ретте мердігерлер аумақтарды абаттандыру ісіне кіріседі. Құрылыс алаңына арнайы барған шаһар басшысы Аян Бейсекин авторлық және техникалық қадағалау мамандарына күн сайын нысанда болып, жұмыс барысын қатаң бақылауды тапсырды.
Айта кетейік, үш үйдегі 180 пәтер тұрғын үй кезегінде тұрған азаматтарға жеңілдетілген несиелік бағдарламалар аясында ұсынылатын болады. Сол арқылы жергілікті билік олардың тұрғын үй жағдайын жақсартуды көздейді.
Жалпы, соңғы бірнеше жылда Екібастұз қаласында бюджеттік және жеке инвестициялар есебінен 250 мың шаршы метр тұрғын үй пайдалануға берілді.
Қ.ТІЛЕКТЕСҚЫЗЫ.