Ауданда су тасқынын алдын алу бойынша жұмыстар талапқа сай жүргізілуде. Мұндай шаралар алдағы уақытта да белсенді түрде жалғаспақ.
Жуырда аудан басшысы Қаршыға Арынов Шолақсор ауылына жұмыс сапарымен барып, елді мекендегі үздіксіз электрмен қамтамасыз ету бойынша атқарылған жұмыстармен танысты. Жоба аясында облыстың Жұмылдыру даярлығы басқармасынан төтенше жағдайларды жою үшін әкелініп, орнатылған жылжымалы сорғы станциясы іске қосылды. Сонымен қатар, Павлодар тарату электр желілер (ПРЭК) күшімен 11 электр бағанасы орнатылып, 660 метр электр желісі тартылып, 250 кВт қуаттылықтағы кешенді трансформаторлық қосалқы станция орнатылды. Одан бөлек, аудан әкімі Шілікті ауылында су тасқынының алдын алу шараларымен танысты. Оның сөзінше, биыл елді мекендерді су басу қаупі жоқ. Дегенмен, мамандар барлық аудан бойынша еріген қар суының деңгейін бақылауды жалғастырады. Жаңа іске қосылған электр желісі төтенше жағдайлар кезінде пайдалануға арналған.
Ақжол ауылында газ қазандығының құрылысы жалғасуда. Мердігер осы аптада жұмыстар толықтай аяқталатынын атап өтті. Қазіргі уақытта қазандарды байланыстыру жұмыстары және электр қуатына қосуға дайындық жүргізілуде.
А.БОРАНБАЕВА.