Баянауылда Жаяу Мұсаның 190 жылдығы аталып өтеді
Биыл аймағымызда есімдері елге етене таныс бірқатар жерлесіміздің мерейтойы аталып өтпек. Олардың қатарында қазақ халқының мақтанышы, ұлт күрескері, ақын, әнші Жаяу Мұса Байжанұлы, сондай-ақ ХХ ғасыр басында Алаш ұйымының қайраткері болған ақын Қадыр Тайшықов, жазушылар Қалмұқан Исабаев, Есентай Ерботин бар. Осы аталған төрт тұлғаның мерейлі тойлары Баянауыл баурайында бірге тойланады деп жоспарлануда.
Нұржайна ШОДЫР
Баянауыл ауданы әкімінің орынбасары Қинаятолла Талиповтың айтуынша, аталған мерейтойларды өз деңгейінде атап өту мақсатында ағымдағы жылдың қаңтар айында мәдени іс-шаралар жоспары бекітілген. Сол бойынша аудандағы мектептер, кітапханалар мен мәдениет үйлерінде дөңгелек үстелдер, тәрбие сағаттары, көркемсөз оқу байқаулары, спорттық жарыстар және басқа да әр түрлі тақырыптағы іс-шаралар ұйымдастырылуда екен.
— Мәселен, жазушы, өлкетанушы, Ұлы Отан соғысының қатысушысы, Қазақстан Жазушылар одағының мүшесі, ҚР еңбек сіңірген мәдениет қайраткері Қалмұқан Исабаевтың туғанына 100 жыл толуына орай облыстық прозалық шығармалар байқауы өтуде. Бұл мақсатқа жергілікті қазынадан 6 млн 750 мың теңге қарастырылды. Байқау қорытындысы бойынша шағармалар жинағын баспадан шығару көзделуде. Сондай-ақ, ақын, әйгілі әнші әрі сазгер Жаяу Мұса Байжанұлының 190 жылдығы, балалар әдебиетінің өкілі, ақын Есентай Ерботиннің 85 жылдығы және кинорежиссер, актер, музыкант, ҚазКСР-ның Еңбек сіңірген әртісі Қуат Әбусейітовтің туғанына 100 жыл толуына орай аудан оқушылары арасында шығармашылық байқау ұйым-дастырылады, — дейді Қинаятолла Талипов.
Сонымен қатар, Жаяу Мұса Байжанұлының 190 жылдығын тойлау қарсаңында «Жасыбай» демалыс аймағындағы Жаяу Мұсаның ескерткіші орналасқан алаңға және Жаңатілек ауылындағы Жаяу Мұсаның бюсті қойылған аумаққа абаттандыру жұмыстары жүргізілмек. Осы мақсатқа жергілікті қазынадан 9 млн теңге көлемінде қаржы бөлінбек. Бұдан бөлек, шілде айында демеушілер есебінен жеңіл атлетикадан 21 және 10 шақырым қашықтық-тарға жүгіруден ашық облыстық турнир өткізу жоспарлануда.
— Жалпы, мерейтой иелеріне арналған негізгі мәдени шаралар алдағы жаздың тамыз айына жоспарланып отыр. Атап айтқанда, Жаяу Мұсаның 190 жылдығы, Қадыр Баспақұлы Тайшықовтың 125 жылдығы, Қуат Әбусейітовтің 100 жылдығы және Қалмұқан Исабаевтың 100 жылдық мерейтойларын Баянауылдағы «Мойылды» алқабы аумағында бірге тойлау және әр тұлғаға арнап тақырыптық этноауылдар құрып, мәдени, спорттық шаралар ұйымдастыру жоспарлануда. Осындай дара тұлғаларымызды ұлықтап, олардың рухани мұрасын, өнері мен шығармашылығын насихаттау – баршамызға ортақ міндет. Мұндай шаралардың жас ұрпаққа берер үлгі-өнегесі мол болмақ, — деп атап өтті Баянауыл ауданы әкімінің орынбасары.